LAB-in proposal theh luh turah tualchhung mite ngaihdan thawh ve turin ngen

Ladakh-a vantlang leh sakhaw hrang hrang intel khawmna pawl, Leh Apex Body (LAB) chuan ministry of home affairs hnena draft proposal thar an thehluh leh turah tualchhung mite chu harsatna an tawh mekah an ngaihdan thawh ve turin an ngen. Tualchhung miten judicial commision hnena affidavit 50 chuang an theh luh avangin lawmawm an tih thu an sawi bawk.

LAB-in proposal thar MHA hnena an theh luh leh tur hi Tsering Tashi kaihhruai Zanskar pawlin state nihna leh Ladakh tana Lok Sabha seat hnih dil belhna an dodal vang niin; LAB hian mipuite chu an thil hmuh dan tarlang ve tur hian an ngen zui ta a ni.

Leh district-a September 24-a vantlang lungawi lohna lantirnaa mi pali thihna thleng vang khan Justice (retd) B.S. Chauhan kaihhruaiin judicial commission din a ni a, security force-te silai hmehpuah chungchang ngaihtuah leh chhuichian hna kalpui mek a ni.

LAB member Mustafa Haji chuan dilna theh luh thar turah hian vantlang mipui tel chu thil ṭul a nih thu leh LAB chu langtlang tak a ni tih tilang tur a nih thu a sawi a; chhui chianna kalpui tur pawh ṭan lam nei lo leh dik a nih ngei a beisei tih a sawi. September 24-a thil thleng vang khan mi pali an thih bakah hliam eng emaw zat awmin tualchhung mi pakua jail-ah khung an ni bawk.