Republic Day vawi 71-na lawm
India chuan nimin khan Republic Day vawi 71-na a lawm a, a lawmna pui ber New Delhi-a Rajpath-ah prime minister Narendra Modi hoa lawm niin, Brazil president Jair Bolsanor chu khuallian a ni. Tun ṭum hi Republic Day lawmnaa khuallian atana Brazil President hman a nih ṭum thumna a ni.
Prime minister Modi chuan Republic Day lawmna ṭan hma hian National War Memorial tlawhin, ram tana nunna hlantu sipaite zahna a hlan. Hei hi Republic Day nia PM-in sipai martarte zahna hlan tura Amar Jawan Jyoti tlawh lo a, National War Memorial zawk a tlawh vawi khatna a ni. National War Memorial hi independence hnu lama ram tana nunna hlantu, sipaite hriatrengna tana siam niin nikum February thla khan PM Modi hian a lo hawng tawh a ni.
Rajpath-a Republic Day lawmnaah President Ram Nath Kovind chuan hnam puanzar a pawt pharh a, national anthem leh 21 gun salute in a zui nghal a ni. Rajpath-a Republic Day lawmna buatsaihah hian Home Minister Amit Shah, Defence Minister Rajnath Singh, External Affairs Minister S Jaishankar, former prime minister Manmohan Singh, Congress president Sonia Gandhi leh Delhi Chief Minister Arvind Kejriwal te pawh an tel.
Parade neihnaah tableaux 22 pholan a ni a, state leh UT 16 bakah central ministry, department leh National Reponse Force (NDRF) ten an pholang a ni. Jammu and Kashmir pawh UT zingah a vawi khatna atan rawn telin, 'Back to Village' programme chu tableau ah a rawn tarlang. Heavy helicopter Chinook leh attack helicopter Apache pawh a vawi khatna atan inlanin, A-SAT weaspons system lantir a ni bawk. Ralthuam pholan zingah hian Dhanush Gun System leh K-9 Vaijra-T pawh an tel a, ramchhunga air defence system siam hmasak ber, Akash weapon system pawh Rajpath-a pholan a ni bawk. Indian Navy lam pawhin Boeing P8I Long Range Maritime Patrol Aircraft, Kolkata Class Destroyer leh Kalvari Class submarine-te chu Republic Day parade-ah hian an rawn pholang a ni.
CRPF-a all-women bikers contigent in daredevil act an lantir bawk a, mipui lawm an hlawh hle. Inspector Seema Nag-in contigent hi a kaihruai a ni. Rajpath-a Republica Day lawmna inkhawm buatsaih hi chawhma dar 10-ah ṭan niin, minute 90 chhung hun hman a ni.