Inhuamna chinah FTA ziah mai ni se : Piyush Goyal

Commerce and Industry minister Piyush Goyal chuan, insumdawn tawnna tura India offer siamte US-in ṭha a ti a nih chuan, ram pahnihte inhuamna chinah insumdawn tawnna tura inremna chu ziah mai nise, a ti.

India leh US insumdawn tawnna tur, Free Trade Agreement (FTA) chungchanga inbiakna chu Nilaini khan ram pahnih aiawhte'n an nei leh. Meeting zawhah US trade representative Jamieson Greer chuan India offer chu ṭha an tih thu thuthar lakhawmtute hmaah a sawi a ni.

Goyal chuan US president Donald Trump-a kaihhruai sorkarin India offer an dawnsawn dan chu lawmawm a tih thu sawiin; mahse, hun rei tak aṭanga beisei tawh ram pahnih insumdawn tawnna tura inremna turah erawh hun tawp mumal an siam theih loh thu leh inremna ziah theih a la nih loh thu a sawi.

Minister chuan FTA kalpuina tur chungchangah hian ram aiawhte'n vawi nga inbiakna an neih tawh thu sawiin, tun hnaia US deputy trade representative Rick Switzer-a'n India a rawn tlawh chu inbiakna kaihhnawih a nih loh thu a sawi a; a rawn zin chu inhriat chianna ṭha neihna tur a nih zawk thu a tarlang.

Switzer kaihhruaia ni hnih chhung inbiakna neih chu Ningani khan tawpin, ram pahnih aiawhte chuan India-US trade and economic inremna kaihhnawih thlirletna an neih bakah, ram pahnih hlawkna tel theihna tur bilateral trade agreement (BTA) pawh an sawi tel bawk.

Hetih laiin prime minister Narendra Modi chuan Ningani khan telephone kaltlangin president Trump a bia a, eceonomic huanga inremna tur, ram pahnih duh dana tihfel chu a inpeih reng thu a hrilh nawn leh. Hei bakah hian hruaitu pahnihte hian sumdawnna, critical technology, energy, defence leh security-a thawh dunna huang zauh pawh an sawi dun tih official chuan an tarlang.