DGCA-in flight operation inspector 4 ban

Ram chhunga thlawhtheihna service leh inrelbawlna hrang hrang enkawltu, Directorate General of Civil Aviation (DGCA) chuan tun hnaia IndiGo buaina thleng chhuichianna an kalpui hnuah flight operation inspector pali an ban tir.

Hetih laiin thuthlukna hi engvanga siam nge a ni tih hriat a la ni lo a, DGCA lamah pawh zawhna a tam phah hle. IndiGo-in pilot a mamawhna zirchiangin, airline chu tun thlasik chhunga service 10% a pun tir turin an ngen a; hei bakah pilot duty leh chawlh dan tur chu dan thar siam milin an kal em tih chu zirchiang turin an ngen bawk.

DGCA chuan IndiGo CEO Pieter Elbers chu nimin khan flight service siamṭhatna tur atana hma a lak dan chungchangah koin, pilot tam zawk ruai tur leh thlawhtheihna service khaihlakin a nghawng khualzinte hnenah refund-a harsatna awm leh compensation chungchangte an zawt a ni. Ningani khan Elbers hi DGCA din, inquiry panel hmaah a lo inlan tawh bawk a ni.

IndiGo hian flight service lamah harsatna a la tawk zel a, Ningani khan Delhi-Bengaluru inkarah flight 200 chuang a cancel a, nimin khan flight 54 a cancel leh bawk.