RG Kar pawngsual thubuai SC-in Calcutta HC-ah hlan

Supreme Court chuan nikum August 9-a RG Kar Medical college-a trainee doctor pawngsual leh thahna thleng chungchang a ngaihtuah chu nimin khan Calcutta High Court ngaihtuah zui turin a hlan chhawng. SC chuan high court chief justice chu ngenna thlente ngaihtuah tur division bench mumal din turin a tinghal bawk.

Justice M.M. Sundresh leh Satish Chandra Sharma ṭhutna bench chuan thubuai ngaihtuahna chu high court-a hlan chhawng tur hian an hriattir a ni. Nikuma pawngsual leh inthahna thleng chungchangah SC hian suo motu cognisance in thubuai hi a la zui a ni.

SC chuan thubuai a hlan chhawn rual hian CBI status report chu pawikhawihna tawktu chhungte hnenah hian hlan turin registry chu a hriattir nghal bawk. Kolkata trial court chuan he pawikhawihna thleng thubuaiah hian Sanjeev Roy chu thiam loh chantirin, thih thlenga lungin tang turin a chungthu a lo rel tawh bawk.

Doctor zirlai pawngsual leh thah a nih avang hian ram pumah lungawi lohna lantir zui niin, doctor zirlai leh thawktute chuan sorkar nawrna atan ni eng emaw zat chhung chaw an nghei bakah damlo enkawl thlengin a kalpui zui duh loh phah a ni.