India leh Oman-in CEPA-ah inremna ziak

US-in India bungraw chawk luh aṭanga chhiah lak a tihpun hnuah, India chuan khawvel ram dang hrang hrang nena insumdawn tawnna kawng a dap a, nimin khan Oman ram chu insumdawn tawnna tura inremna, Comprehensive Economic Partnership Agreement (CEPA) chu India-Oman Business summit, Muscat-a neihah a ziahpui.

Oman-a cham mek prime minister Narendra Modi chuan summit buatsaih chuan ram pahnih tan thawh dunna kawng tharah a hawng thei dawn tih a sawi a; nimina thutlukna an siam chuan kum tam tak liam hnu thlengin nghawng a neih tur thu a sawi. Oman-a company-te chu hmasawnna thlen tura thawhpuiah a sawm nghal bawk.

India chuan ram dang lian tak tak European Union, New Zealand, leh Chile-te chu insumdawn tawnna neihpui turin inremna a lo ziahpui tawh bawk. Heng inremna kaltlang hian khawvel huapa bungraw thawn chhuah kawngah nasa takin India chuan hma sawn theih phah dawn a ni. Hei bakah hian mi tam tak tan hnathawh tur a siam belh thei dawn niin official chuan an tarlang.

Oman leh India insumdawn tawnna hlut zawng hi kum 2024-25 chhung khan USD tld 10.5 a tling a, India-in bungrua a thawn chhuah hlut zawng hi USD tld 4 leh chawk luh hlut zawng hi USD tld 6.54 a tling a ni.