NIA-in Delhi-a bomb puak kaihhnawihah mi pakhat man leh

National Investigation Agency (NIA) chuan Ningani khan November 10-a Delhi-a Red Fort bula car bomb tihpuah kaihhnawihah mi pakhat a man leh. Bomb puak kaihnawihah mi pakua an manna a ni.

NIA in an man hi Shopian, Srinagar, Jammu & Kashmir ami, Yasir Ahmad Dar a ni a, New Delhi-ah an man a ni. NIA chuan thuchhuah siamin, Yasir hi November 10-a car bomb tihpuahna tura ruahmannaah a tel a, pawikhawihna thlen tur hian thutiam pawh a la a ni, a ti. He thil thleng kaihhnawiha man dang, a bikin bomb tipuaktu Umar Un Nabi leh Mufti Irfan te nen pawh a inbepawp fo tih an tarlang.

Tun thla tir lam khan NIA hian Baramulla, Jammu & Kashmir ami Dr Bilal Naseer Malla pawh an lo man tawh bawk. Bilal hi Umar Un Nabi hnenah pawikhawihna thlen dan turte hrilh leh, finfiahna awmte tichhiaah puh a ni. Bomb tihpuahna ruahmantu ber zinga puh, Al Falah University-a thawk Dr Muzammil Shakeel Ganie leh Dr Shaheen Saeed te office pawh dapin, pawsa fai bakah gold leh hmanraw dang eng emaw zat manin, hengte hi uluk taka zirchian mek an ni.

Delhi-a car bomb tihpuah chungchang chhuina kal zelah, NIA hian Jammu & Kashmir, Uttar Pradesh leh Haryana-ahte hmun eng emaw zat an dap tawh. Digital device leh thil dang pawimawhte pawh man an nei nual tawh bawk.

November 10-a Delhi-a Red Fort bul, Lal Quila metro station bula car-a bomb tihpuah vang khan mi 15 an thi a, hliam tam tak an awm. Unlawful Activities (Prevention) Act (1967) hnuaiah he pawikhawihna thleng hi firfiakte beihnaah puan a ni. Bomb puahna, Hyundai i20 car khalhtu leh bomb tipuaktu hi Umar Un Nabi a ni a, Faridabad-a Al Falah University-a General Medicine Department-a Assistant Professor a ni. Anti-terror agency hian Nabi motor dang pawh an mansak tawh a, enfiahin thuhretu pawh 73 koh a ni.

NIA special court chuan an mi man thar, Yaris hi December 26 thleng NIA kuta awm turin a dah. Pawikhawihna thleng NIA in a chhuinaah hian Delhi Police, Jammu and Kashmir Police, Haryana Police, Uttar Pradesh Police bakah agency hrang hrangten an pui bawk.