New Delhi-a Factory Kangah Mi 43 thi

New Delhi-a Anaj Mandi on Rani Jhansi Road bazar lun tak, Sadar Bazar-a luggage factory chu nimin zing khan a kang a, mi 43 an thi. Thi zinga a tam zawk chu factory-a hnathawkte an ni.

Kangmei chhuah hunlai vel hi zing dar 5.22 vel niin a hmuna awm te chuan an sawi. He factory hi chhawng 5-a sang a ni a, kangmei chhuah chhan hi hriat chian la ni lo mah se a chhui hna thawh mek a ni New Delhi deputy police commissioner Monika Bhardwaj chuan thite hi mi 43-an nih thu sawiin, mi 16-te chu damdawi-in panpui an nih bakah, he hmunah hian mi 58 chhanchhuah an nih thu a sawi bawk. Fire Services chief Atul Garg chuan chhanchhuah hna hi Fire department-in an thawh thu leh, kangṭhelh motor 25 hmanga kangmei hi ṭhelh mih a nih thu a sawi. 

Prime minister Narendra Modi chuan he chhiat tawhna thleng hi a twitter lamah pawi a tih thu sawiin, vanduaina tawk chhungtea tawrhpui thu a tarlang. Delhi chief minister Arvind Kejriwal chuan thi chhungte hnenah zangnadawmna cheng nuai 10 ṭeuh sorkarin a pek tur thu leh, inhliamte'n cheng nuai khat ṭheuh a pek tur thu a sawi ve bawk.