Pawngsual thubuai rang taka chinfelna tur fast track court State leh UT 15-in la siam lo

Tunhnaiah pawngsualna rapthlak tak thlengin rampum a nghawr nghing mek a, chutih laiin pawngsual thubuai rang taka chinfelna tur fast- track special courts (FTSC) chu state leh Union Territory (UT) 15-te chuan an la din lo.

Sorkar laipui chuan state leh UT tinte hriattirna a pe nawn fo a, heng state 15-te hian sorkar laipui hnenah hian chhanna pawh an pe lo nia tarlan a ni. Sorkarin ruahmanna a siam dan chuan FTSC hi Protection of Children from Sexual Offences (Pocso) Act hnuaia thubuai ziahluhte pawh ngaihtuah tel  tura tih a ni.

Kumin July thla khan sorkar laipui chuan Pocso Act leh pawngsual thubuai lut 1,66,882, court hrang hranga tihkhawtlaite chu special court 1,023 dina chingfel thuai turin a ti a, Supreme Court pawhin November 13 khan thupek tichhuak ve bawkin Pocso thubuai 1,60,000 chinfelna tur FTSC din turin a ti bawk.

Sorkar laipuiin thupek a tihchhuah aṭanga thla li a liam hnuah pawh state leh UT 16 chiahin scheme hi la zawmin Union ministry of law and justice pawhin court dinna tur instalment hmasa ber pawh a pechhuak tawh nghe nghe. Heng state-te hi Jharkhand, Tripura, Nagaland, Uttara­khand, Madhya Pradesh, Maharashtra, Rajasthan, Odisha, Manipur, Kerala, Karnataka, Gujarat, Chhattisgarh, Haryana leh Delhi-te an ni a, Chan­digarh aṭang pawhin ministry hian ngenna a dawng tawh bawk a ni.

Hetihlai hian Telangana leh Uttar Pradesh, khawvel hriatpui khawp pawngsualna thlenna state-te chu hma la duh lo state zingah hian an la tel a, mahse Nilaini khan Telangana hian Hyderabad-a pawngsualna rapthlak tak thleng avang khan FTSC chu an din ve ṭan chiah a ni.