Mamata-i'n a tawp thlenga CAB dodal a tum

West Bengal chief minister Mamata Banerjee chuan BJP kaihhruai sorkar laipuiin tunkara Parliament-a pharh a tum, Citizenship (Amendment) Bill chu an party chuan a tawp thlenga dodal a tum tih a sawi. 

Kar kal ta Inrinnia Kolkata-a Trinamool Congress work rally neihnaa thu a sawiah, Banerjee chuan CAB leh National Register of Citizens chu ang khat reng an nih thu leh, Constitution kalh an ni tih a sawi. "CAB hian sakhaw thliar bik awm lo a, sakhaw tin hnenah khua leh tui nihna a pek theih chuan kan thlawp thei ang. Mahse sakhaw thliar hranna a awm chhung chuan kan dodalin kan bei let zel dawn," a ti. BJP chuan Lok Sabha leh Rajya Sabha-ah pass thei mah se, Bengal-ah chuan hman an remti dawn lo tih a sawi a ni. 

CAB hi Pakistan, Bangladesh leh Afgha­nistan aṭanga India rama rawn pem lut, Muslim sakhua zuitu ni lote hnena India khua leh tui nihna pek theihna tur a ni. Parliament-a pharh a nih theih nan kar kal ta Nilaini khan union cabinet chuan a lo pawm tawh a ni. 

Bengal Chief Minister chuan eptu party leh hmarchhak bial mipuiten nasa taka an dodal chunga BJP sorkarin Parliament-a pharh luih a tum chhan chu, India ram economy dinhmun tlahniam zelin harsatna a thlen mek laka mipuite rilru lakpen tumnaah a puh bawk.