ISRO-in inbiak pawhna tichak tur satellite kap chhuak dawn

Indian Space Research Organisation (ISRO) chuan US-a awm AST SpaceMobile nena thawk dunin, inbiak pawhna tichak thei tur BlueBird Block-2 satellite chu December 24 hian LVM3 M6 Mission hmangin an kap chhuak dawn. Satellite hi inbiak pawhna chak tak high-speed cellular broadband, khawvel puma smartphone kaltlanga hman theih pe chhuak thei tura duan a ni.

AST SpaceMobile (AST & Science, LLC) hian a hmasa ber leh awmchhun, space-based cellular broadband network siam ṭhinin, smartphone aṭanga hman theih leh vantlang leh sorkar tan pawha hman kawp theih tura a duan a ni bawk. Hei bakah AST hian nikum September khan Blue Bird 1-5 kap chhuak tawhin, US leh ram thlan bik chuan internet chak tak an lo hman theih phah tawh bawk.

ISRO chuan NewSpace India Ltd Bengaluru-a ISRO commercial ban pawimawh tak leh AST SpaceMobile inremna angin mission neih tur hi vantlang hman theih tura duan a nih thu an tarlang. Hei bakah hian BlueBird block-2 mission hi global Low Earth Orbit constellation satellite leh mobile direct-a inthlunzawm theihna tur a ni. Hemi hmang hian 4G leh 5G voice, video calls, texts, streaming leh data hman thlengin a theih dawn a ni.

BlueBird Block-2 LVM3 rocket hmanga kah chhuah tur niin Low Earth Orbit a payload kah chhuah rit ber a ni dawn a; LVM3 rocket hian Chandrayaan-2, Chandrayaan-3 leh OneWeb mission pahnih satellite 72 phurte hlawhtling takin a lo kap chhuak tawh bawk. ISRO mission kah chhuah hnaivai ber chu November 2-a communication satellite, LVM3-M5/CMS-03 mission-a kah chhuah kha a ni.