MGNREGA ṭhiahin nghawng ṭha lo tak a nei ngei dawn : Sonia Gandhi

Congress Parliamentary Party chairperson, Sonia Gandhi chuan nimin khan central-a BJP kaihhruai sorkarin Mahatma Gandhi National Rural Employment Guarantee Act (MGNREGA) hming thlak a, a kalphung a siam danglam chuan ram chhung hmun hrang hranga thingtlang miteah nghawng ṭha lo tak a nei ngei ang, a ti.

Parliament thlasik ṭhutkhawm neih zawh takah MGNREGA thlakna tura Viksit Bharat Guarantee for Rozgar and Ajeevika Mission (Gramin) (VB-G RAM G) Bill put luh chu pawm a ni a, Pathianni khan president Droupadi Murmu chuan pawmpuiin a hming a ziahnan tawh a ni. BJP chuan Congress kaihruai, United Progressive Alliance (UPA) sorkar laia siam, MGNREGA a hi hming a thlak bakah, a kalphung pawh a siam danglam. Ni 100 inhlawhna tur siamsak chu ni 125 ah a tipung a; mahse, hna thawh dan tur chungchangah kalphung hmasa ang lo takin mipui lam mamawh aiin sorkar laipuiin a duhdante a dah pawimawh tawh zawk niin Gandhi chuan a sawi. VB-G RAM G chu thingtlang mite hma khaw ngaihna ni loin, bureaucatic mila siam zawk a nih thu a sawi.

Gandhi chuan thingtlang lam mite ngai pawimawh a, an dinhmun chawikanna tura employment guarantee scheme siam chu BJP chuan a nuaibo a ni, a ti. MGNREGA chu Constitution-a Article 41 zulzuia duan a ni a, hei hi Mahatma Gandhi-a hmathlir behchhana siam a ni, tiin a sawi. MGNREGA hi thingthlang mi, a bikin ram nei ve loten an chhawr ṭangkai a, "Dan thar hnuaiah chuan an hlawkpui ve theihna tur hi nuaibo sak an ni," a ti. Sum lama harsatna nei, state-te dinhmun pawh a tihchhiat zual phah dawn niin a sawi bawk.

VB-G RAM G Bill ah hian thingtlang mite tana inhlawhna siama sum sen hi sorkar laipui leh state-ten 60:40 in an intum sem tawh dawn a, hmarchhak leh Himalalya tlangdung state-te erawh chu sorkar lapuiin 90% a tum thung ang. Legislature nei lo Union Territory-te chu sorkar laipuiin 100% a tumsak dawn bawk a ni.