I&B Ministry-in concert economy zauhnan LEDC din

Information and Broadcasting Ministry chuan ram chhungah concert economy tihzauhna turin Live Event Developement Cell(LEDC) a din a; hemi kaltlang hian hnathawh tur leh tourism tihhmasawnna thlen tir tum a nih thu an puang.

India-ah hian tun hnaiah live event industry-in nasa takin hma a sawn chho mek tih I&B chuan tarlangin, media leh entertainment huangah nasa takin hlawkna a thlen tih an sawi. Kum 2024 chhung khan live event market hlut zawng hian Rs vbc 20,861 a tling pha a, a kum hmasa aiin 15% in a ṭhang a ni.

Beisei anga live event-te ram chhungah a ṭhan chhoh zel chuan CAGR (Compound Annual Growth Rate) chu 18% a tlin theih rin a ni a, hei bakah hian kum 2030-ah chuan khawvel huap pawha live entertainment hmahruaitu ram a nih theih beisei a ni. Prime minister Narendra Modi pawhin nikuma WAVE summit hmannaah khan India chu live entertainment sector tihlenna theihna ṭha tak a nih thu a lo tarlang tawh bawk.

Live event sector hian ram chhungah hna thawh tur maktaduai 10 bawr a siam a, live event lian tham pakhat aṭangin hna thawh tur direct leh indirect 15,000 a siam pha bawk. Nikum chhung khan ram chhungah live event chhim tur hian mi nuai nga chuang chu khawpui dangah an zin chhuak a, kum hmasa lam aiin 18% in zin chhuak hi an pung a ni.