West Bengal CM-in an state-ah SIR titawp turin phut

West Bengal chief minister, Mamata Banerjee chuan Chief Election Commissioner, Gyanesh Kumar hnenah lehkha thawnin, an state-a electoral roll ennawnna, Special Intensive Revision (SIR) kalpui mekah a felfai tawk lohna te siamṭha turin a phut a, an siamṭha lo a nih chuan SIR kalpui mek chu titawp rih turin a ti.

CEC hnena lehkha a thawnah, CM Banerjee chuan, "Thil dik tawk lo leh felfai tawk lote chu rang thei ang bera siamṭha turin ka ngen che. Hei hi a tih theih loh chuan hna kalpui mek hi tihtawp rih a ngai a ni. Tuna an tih dan anga kalpui chhunzawm a nih chuan voter dik tak tam tak paih an ni dawn a, hei hi democracy kalphung innghahna beihna a ni dawn a ni," a ti. Hei hi West Bengal-a SIR kalpui a nih hnuah CM-in CEC hnena lehkha a thawn vawi thumna a ni a, January 3 khan a thawn a ni. Nikum November 20 leh December 2 khan a lo thawn tawh bawk.

CM lehkhathawn hnuhnung berah hian SIR kalpui danah nitin kahhruana buaithlak taktak tihchhuah thar reng a ni tih a sawi a, hengte hi official taka inpek ni loin, WhatsApp leh text message hmangin an pe ṭhin tih a tarlang. "Ziaka inhriattirna emaw, order tihchhuah emaw a awm ngai lo. Hetianga formal lo taka thuchhuah siam hi a felfai loin a rintlak tawk lo ṭhin," a ti. A lehkha thawn hmasa pahnihah pawh CM hian SIR buaipuitu Booth Level Officer leh elector ṭhenkhat thih chhanah SIR mumal lo leh buaithlak lutuk vang tiin a lo puh tawh bawk a ni.

Banerjee chuan hearing neih tura elector kohte chu koh a nih chhan hrilh chian an ni lo a, hei hian mipui pawh a tihchiai phah a, hauhte an tawrh phah fo tih a sawi. "Kum upa leh dam lo te pawh ngaihnathiam an ni lo. Mi tam tak chu hearing nei turin km 20-25 a thuite an kal a ngaih phah a ni, hei hian mipui nawlpuiah harsatna tam tak a thlen a ni," a ti. Kar liam ta Inrinni khan roll ennawna inlan tura koh, kum 68 mi chu damdawi-in aṭanga a chhuah hlim niin, a hnarah cannula vuah chungin a inlan a, a hnu lawkah a thi a ni. Ani bakah damlo chunga hearing nei tura koh tam tak an awm bawk a, heng thilte hi Banerjee chuan na takin a sawisel a, an party Trinamool Congress mi leh sate pawhin lungawi lohna an lo lantir tawh bawk. Damlo, rualbanlo leh kum upa zawkte chu SIR hearing nei tura koh chhuah tel an ni chu an duh lo tih an sawi a, zawhfiah ngai awmte chu observer-ten an inah kalchilh a, zawt mai turin an phut.

Hetih lai hian West Bengal-a Leader of Opposition, BJP hruaitu Suvendu Adhikari chuan CEC Kumar hnenah an state-a SIR kalpui mek chu bahlah loa chhunzawm zel turin a ngen ve thung. CM-in SIR tihtawp tur a ngenna chu thil dang vang ni loin, thuneihna a chan chhunzawm zel theihna tura roll ennawn mek tihbuai a tumna niin a sawi ve thung. CM chhuanlam siamte pawh chu rintlak tawk lo tiin, an state-a roll ennawn hna thawk turin Booth Level Officers (BLOs) leh Electoral Registration Officers (EROs) 50,000 chuangin training ṭha tak an nei vek a ni, a ti. WhatsApp hmanga information pek pawh hmanhmawh thila thil inhrilhriatna atana ṭangkai a ni tiin, digital platform hman chu a ṭul thu a sawi.