Kumin-ah India-EU inlaichinna ṭhanna kan hmu dawn : EAM

France leh Luxembourg tlawha zin mek external affairs minister S. Jaishankar chuan Luxembourg a thlen hnuah, kumin 2026 chhungin India leh European Union inlaichinna neih chu nasa takin a ṭhang dawn tih a sawi. Jaishankar chuan aṭhanna tur chu inring tawk taka sawi a nih thu a tarlang bawk. Jaishankar chuan Luxembourg a cham chhung hian India mi leh sa chengte nen in kawmna hun a hmang nghal a ni.

EAM hian Luxembourg prime minister Luc Frieden nen chipchiar leh huam zau takin inkawmna hun an hmang nghal a; foreign minister Lavier Bethel chuan a telpui bakah Grand Duke of Luxembourg Guillaume V nen inbiakna hun an nei bawk. India leh Luxembourg inlaichinna chungchang sawi hoin EAM chuan India leh EU inlaichinna neihah Luxembourg chuan hmun pawimawh tak a chan thu a sawi a, hei bakah hian India chuan free trade agreement nei tura inbiakna hrang hrang neih pawh a inpeih tawh thu a sawi lang.

Jaishankar chuan economy leh ram ṭhan lenna tura India inpuahchah mek thu sawiin, ramchhunga thil siam chhuah leh tharte chu khawvel huapa theh darh tura hma a lak thu a sawi. Nikum chhunga chhiah hrang hrang tihdanglam a ni chung pawhin bungraw thawn chhuah kawngah mipui beisei aia nasaa aṭhat zawk thute a sawi a; tun hnai kum rei lote chhung khan ram hrang hrang nen FTA India-in a neih chu sumdawn tawnna atana ṭangkai tak leh an thawhpuite tan pawha chhawrnahawm tak tur a nih thute a sawi lang bawk.