Congress-in ni 45 awh tur ‘MGNREGA Bachao Sangram’ kalpui ṭan

Congress party chuan Inrinni liamta aṭang khan MGNREGA thlakna, Viksit Bharat-Guarantee for Rozgar and Ajeevika Mission (VB-G RAM G) dan thar hman duh lohna leh hlip leh tura ngenna,‘MGNREGA Bachao Sangram’ chu ram pum huapin an kalpui ṭan. Campaign hmang hian VB-G RAM G Act chu hmang lo a MGNREGA zawk hman leh chu an nawr dawn a, February 25 thleng a awh ang.

Campaign hawn ni hian district headquarters hrang hrangah thuthar lakhawmtute kawmin, district level protest huaihawt nghal a ni a, ni khat awh chawnghei an kalpui bawk. Party chuan "right to work, livelihood and accountability" chu tuaithar leh a nih hma chu campaign hi chhunzawm zel an tum thu an tarlang.

Congress party chuan khawpui leh thingtlang hmun hrang hrangah January 12 aṭanga 19 chhung 'Chaupals' (village gatherings) leh VC level-ah mass contact programme huaihawt an tum a, January 30-ah hian ward-level peaceful sit-in neih chhunzawm leh tum a ni bawk. Hei bakah February 7-15 chhung hian state-level gheraos (encircling) huaihawt tum a ni a; campaign khar hma February 16-25 chhung hian punkhawm lian tham vawi li huaihawt tum a ni bawk.

VB-G RAM G Act hi nikum December-a Parliament Winter Session-ah khan dodalna hrang hrang karah voice vote hmanga pawm a nih hnuin, December 21 khan president Droupadi Murmu chuan hming a ziah hnan hnuah dana pawm a ni zui ta a ni. Dan siam thar hnuaiah hian ni 100 inhlawhna chu ni 125-ah tihpun a nih bakah a kalphung hrang hrang tihdanglam a ni tel bawk a ni.