Home Minister-in Lok Sabha-ah CAB pulut

Union home minister Amit Shah chuan nimina Lok Sabha inkhawmah sawisel hlawh tak, Citizenship (Amendment) Bill chu a pulut ta. 

Eptu member-ten nasa taka an dodal avangin Speaker Om Birla chuan bill putluh duh leh duh lohah vote a la hmasa a, bill putluh duh lamah vote 293 tlain, duh lo lamah vote 82 a tla thung. Hemi hnu hian home minister Amit Shah chuan CAB hi House-ah a pulut ta a ni. 

Minister-in bill a putluh dawn hian eptu lam nen nasa takin an inhnial zui a, Congress member Adhir Rajnaj Chowdhury chuan he bill hi ramchhunga hnam leh sakhaw tlem zawkte bitumna tur bak a ni lo tih a sawi a, Tri­­namool Congress-te pawh mi­­puite ṭhendarhna tur leh ram danpui kalh a nih thu an sawi bawk.

AIMIM chief Asaduddin Owaisi chuan dodalna nasa tak awm chunga bill a pharh luih avangin Home Minister chu Hitler nen a tehkhin a, House Speaker Om Birla chuan na takin a hau zui hial. Mahse Amit Shah chuan he bill hi hnam leh sakhaw tlem zawkte beihna tur a ni lo tih a sawi a, bill chungchangah zawhna hrang hrangte a chhan theih tur thu sawiin hemi rual hian zawhna a chhan a, a sawifiah laiin eptute chu House aṭangin an chhuak bik tur a ni lo, a ti. 

Amit Shah chuan CAB 2019 chu  minority te beihna lam ni loin, dan loa India ram rawn lutte venna tur zawk a nih thu a sawi. Congress chuan sakhaw beh­chhanin India ram chu a ṭhen darh tawh a, hei vang hian he bill hi hman ngei a ngai a ni, a ti. 

Ram danpui mila siam a nih thu leh, a kalh zawng engmah a awm loh thu a sawi. Home minister chuan tunhma lam pawhin kawng hrang hrangin khua leh tui nihna pek theihna tur dan te duan a lo ni tawh ṭhin tih a sawi bawk.  

Shah chuan CAB hman a ṭul thu sawiin, "Afghanistan, Pakistan leh Banglades-ah chuan Hindu, Sikh, Buddhist, Kristian, Parsi leh Jain-ten enhran an tawk a ni. He bill hian sakhaw thil vanga enhran leh tihduhdah tawkte tan India khua leh tui nihna a pe thei dawn a ni. Hemi rual hian he bill hi Muslim-te chanvo paihsakna tur nia sawi chu a dik lo a ni," a ti. 

Heng ram pathum aṭanga Muslim mi, India rama rawn lutten  khua leh tui nihna an dil anih chuan ngaihtuah sak theih reng an ni tho tiin a sawi. Mahse ram pathumte hi Muslim sakhua pawmna ram an nih avangin sakhaw thila tihduhdah te an tuar ve lo a, hei vang hian sakhaw dangten ngaihnathiamna an neih nghal ang erawh chu an nei ve thei dawn lo a ni, a ti. Lok Sabha-a CAB putluh a nih dawn vang hian Parliament complex leh Delhi khawpui chhung hmun dangahte bill duh lohna hi lantir a ni.  Indian Union Muslim League MP-te chuan Parliament complex-a Mahatma Gandhi lim hmaah lungawi lohna an lantir a, All India United Democratic Front (AIUDF) chuan Jantar Mantar-ah nawrh an huaihawt bawk. Hmarchhak state hrang hrangah pawh CAB duh lohna lantir a ni.