I-PAC case chungchangah Supreme Court-ah ED a zualko

Directorate of Enforcement (ED) chu Kolkata-a political consultancy firm, Indian Political Action Committee (I-PAC) leh a dintu zing a mi, Partik Jain dap hna thawhnaah West Bengal chief minister Mamata Banerjee, state official leh mi dangte inrawlhin an hna thawh an tibahlah tih a sawi a, Supreme Court-ah a zualko. I-PAC chungchang hi Central Bureau of Investigation (CBI) chhui tir turin a ngen.

ED chuan Bengal Chief Minister inrawlh chuan dan loa lungalhthei tawlhruk chungchang an chhuina a tibuai niin an sawi a; an dap lai hian CM hi kal vein finfiahna tur awm, document leh electronic device-te tihchhiat a ni, an ti. ED hian Calcutta High Court-ah Banerjee leh a official-te chu agency hnathawh tibahlah zawnga an chet avangin an laka action la turin a lo ngen tawh bawk. Mahse, Bengal sorkar chuan ED chetdan chu thil dik lo tiin, petition a theh lut ve bawk a ni. Banerjee chuan central agency puhna chu thu dik lo a nih thu a sawi ve thung.

West Bengal-a rorellai, Trinamool Congess hian I-PAC firm hi kum eng emaw zat a lo rawn tawh ṭhin a, 2021 assembluy inthlan neih tur leh, a hnu leha inthlan dang awmah pawh he firm hian TMC strategy duanna kawngah pawh a pui bawk. Hetih lai hian ED chuan I-Pac hi dan loa lungalhthei tawlhruknaah inhnamhnawiah puhin January 8 khan he firm nena inkaihhnawih hmun paruk chu West bengal leh Delhi-ah a lo dap tawh bawk.

Kar liam ta Zirtawpni khan TMC MP ṭhenkhat chu ED-in I-PAC office an dap avanga lungawi loin, New Delhi-a union home minister Amit Shah office kawtah an pungkhawm a ni. An zinga ṭhenkhat chu hren zui an ni bawk. Barnjee chuan nawrh huaihawt TMC MP-te hren an ni chu na taka sawiselin, BJP sorkar chu rorellai leh eptu MP nawrh huaihawtte laka a chet danah hleih nei taka thiltiah a puh.