Telangana nula pawngsualtu Mi pali thah chungchang chhui turin SIT din a ni

Telangana sorkar chuan Hyderabad-a November 27 zana veterinary doctor hmeichhia pawngsual rawna thattu, mi palite chu police-te'n an kahhlum chungchang chhui turin, member 8 awmna Special Investigation Team (SIT) a din.

Pawngsualtu mi palite thihdan chungchang leh he thil kaihhawih case dang awm zawng zawng chu SIT hian a chhui dawn a ni. SIT hi Rachakonda Commissioner Mahesh Bhagwat-a'n a kaihhruai dawn a, an thil chhuina atana thil ṭul dang zawng zawngte chu lakkawm vek a nih tur thu a sawi.

Police-te chuan pawngsualtua puh mi pali Mohammed Arif (26), Jollu Shiva (20), Jollu Naveen (20) leh Chintakunta Chennakeshavulu (20)-te hi an man hnuah, December 6 zing dar 3 vel khan an pawikhawihna hmunah hian thil thlendan te hriatchian tumin an hruai thu an sawi a ni. 

Hemi hnu hian hmeichhe ruang an hmuhna bula lei, Hyderabad aṭanga km 50 vela hlaa an awm laiin heng misualte hi tlanbo tumin an zinga pahnih, Mohammed Arif leh Chennakeshavulu-te chuan police-te silai laksakin an bei zui ni a sawi a ni. Hei vang hian police-te chuan invennan kap let nghalin, an pali hian an kaphlum tih an sawi.