Germany Chancellor Friedrich Merz-a'n India a rawn thleng

Germany Federal Chancellor Friedrich Merz chuan nimin khan India rawn thlengin, Sardar Vallabhbhai Patel International Airport-ah a rawn ṭum. Merz hian prime minister Narendra Modi sawmna tihlawhtlingin January 12-13 chhung a cham dawn a, official-a India a rawn tlawh vawikhatna a ni bawk.

Merz leh PM Modi te hian nimin khan Ahmedabad, Gujarat-ah India-a Germnay CEO Forum an hmanpui nghal a, Sabarmati Ashram an tlawh bakah Sabarmati Riverfront-a International Kite Festival-a hun an hman hnuin Mahatma Mandir, Gandhinagar-ah ram pahnih thawh dunna tur chungchang an sawi zui nghal. Ram hruaitu pahnih hian India-Germany Strategic Partnership hlawhtlinnate an sawi dun a ni. India leh Germany ram thawh dunna hi tun hnaiah kum 25 a tling a ni.

Merz leh Modi te hian zirna huanga India leh Germany thawh dunna tihzauhna tur ruangam an tifel nghal a, hei bakah thil dangah pawh huang zau zawka thawh dun dan turte pawh an sawi dun.

Meeting an neih zawh hnuah joint press conference an neihah, PM Modi chuan German University-te chu India-a an campus hawng turin a sawm. Germany-in an rama India mite visa ngai loa zin phalna a siam avangin lawmthu a sawi bawk a, hei hian ram pahnih mipuite inkarah inzawmna ṭha leh nghet a siam dawn a ni, a ti.