China Communist Party team-in BJP leh RSS hruaitute kawm

China-a rorellai, Communist Party of China (CPC) team chu India ramah an rawn zin a, Thawhṭanni khan BJP hruiatute kawmin, nimin khan Rashtriya Swayamsewak Sangh (RSS) hruaitute nen meeting an nei leh.

CPC team hi vice-minister Sun Haiyan-a'n a ho a, kum 2020-a Galwan Valley-a India leh China sipaiten intihbuaina thlen hnuah CPC team-in India an rawn tlawhna hmasa ber a ni. Thawhṭanni khan New Delhi-a BJP head office an tlawh a, BJP general secretary Arun Singh kaihhruai BJP team nen inkawmin, BJP leh CPC thawh dun theih dante an sawi ho. He huna hian India rama China ambassador Xu Feihong pawh a tel.

Sun Haiyan hi CPC International Liason Department-a vice president a ni a, a hmain Singapore-ah China ambassador in a lo awm tawh bawk. CCP leh BJP aiawhte inkawm hnuhnun ber chu kum 2011 January thla kha a ni a, hetih lai hian Nitin Gadkari chu BJP president niin, party aiwhte hi China-ah an zin ve thung a ni. Hemi hma, kum 2009 khan BJP leh RSS hruaitute chuan Beijing a lo tlawh tawh bawk. CPC team hian Congress party aiawhte pawh an hmu dawn bawk a ni.

Ramria sipaite intihbuai thleng vanga ram pahnih inkar ṭha lo chuan ziaawm lam a pan chho nia ngaih a ni a, nikum October thla khan prime minister Narendra Modi leh China president Xi Jinping te hcuan Russia-a Brics summit neih karlah inbiakna pawh an lo nei tawh a, hei hi kum nga hnua inbiakna an neihna hmasa ber a ni. He meeting hian Ladakh khawchhak lam sector-a ram pahnihte inhriatthiam lohna awm mek chinfel dan ngaihtuaha inbiakna neihna tur kawng pawh a hawn phah zui bawk.

Hetih lai hian BJP leh Congress party chuan China chungchang hi inbeihna atan an hmang tawn reng a ni. BJP hian Congres MP Rahul Gandhi leh party hruaitu dangte chu kum 2018 khan thawhdunna tur inremna, MoU a ruaka ziahpuiah an puh. Kum 2017-a Doklam buaina thlen laiin Delhi-ah China official-te a hmu niin an sawi bawk. Mahse an puhnate hi Congress party chuan a hnawl a ni. Congress pawhin PM Modi chu China hlau lutukah puhin, Galwan Valley-a Chian siapite chetdan pawh engtinmah chhang ngam loah an lo puuh ve tawh bawk. Rahul Gandhi chuan LAC-a China sipaite chet dan leh, China-in India ram chin a rawn luah chungchanga Modi kaihhruai a ngawih reng chhan pawh a lo zawt tawh a ni.