Ui seh tawkte hnena zangnadawmna state-in a pek a ngai dawn : SC

Supreme Court chuan nimin khan khawlai ui seh thleng fo ṭhin chungchang a ngaihtuah hnuin, kum nga chuang khawlai ran tlate khuahkhirhna mumal siam tura tih a nih hnuah pawh dan zawm a nih loh avangin, ui seh tawkte hnena zangnadawmna pek ngai chu state-in a pek tur thu a tarlang. Court chuan 'dog lovers' leh chaw lo pe ṭhinte pawh uiin mihring a seh thleng ṭhinah hian mawhphurtu an nih theih thu a tarlang tel bawk.

Justices Vikram Nath, Sandeep Mehta, leh NV Anjaria-te awmna bench chuan November 7, 2025-a court-in thupek a tihchhuah ngaihtuah nawn tura ngenna chu ngaihtuahin, hun eng emaw chen aṭanga dan siam tawh zawm thei lote chuan mawhphurhna an lak a ngai tawh a ni, an ti. Justice Mehta chuan ui seh vanga buaina thleng chu pawl anga chaw lo pe ṭhintute mawhah a tlak tur thu a sawi lang. Khawlai uite chu an khawngaih a, an lainat tak tak a nih chuan eng vangin an inah enkawl tura an lak mai loh tiin justice Nath chuan zawhna a siam zui bawk a ni.

SC hian nikum November khan khawlai ui zawng zawng dah bona tur hmun siam tur hian thupek a tichhuak a, hei hi activist hrang hrang leh ui ngainatu intite chuan an dodal zui nasa hle a, thupek hi siamṭha tura ngenna petition pawh eng emaw zat an theh lut a ni. Dodalna leh sawiselna nasa tak awm kara ngenna thlente ngaihtuahna hnunhnung ber chu Zirtawpni liam ta khan neih a nih leh hnuah, a mawh la turin state kutah court sang ber hian a dah ta a ni.