I&B Ministry leh Netflix thawk dun dawn

India sorkar hnuaia Ministry of Information & Broadcasting leh Principal Scientific Adviser (PSA) office thawk dun chuan Thawhlehni khan themthiamna tihhmasawnna turin Netflix Fund for Creative Equity kaltlangin “Inspiring Innovators-Naye Bharat Ki Nayi Pehchaaan” tan an thawh dun tur thu an puang.

Thawh dunna tur hi Graphiti Studios nen niin, he hmalakna kaltlang hian India thiam thil leh themthiamnate chu thawnthu nen huang khata hruai khawmin chawi lar tum a nih thu Ministry chuan a sawi. Hun hmannaah hian Information & Broadcasting and Parliamentary Affairs minister, L. Murugan chuan tunlai creator-te chuan India thawnthu khawvel huapa puanzar chu sorkar puihna hmangin an ti thei tawh dawn tih a sawi.

PSA Ajay Sood pawhin hmalakna thar chu thiam thil tunlai mil tura ruahman theihna leh, thiamna leh hriatna kawng tihchakna a nih thu sawiin; startup leh zirlaite chu themthiamna hmanga hruaikhawmin Netflix Fund for Creative Equity leh industry a kaihruaitute hmanga puihna pek zel thei tum a nih thu a sawi lang.

Netflix India (Global Affairs) director Mahima Kaul chuan India ṭhalaite thiamna pholan leh, an thiamna tihpunna atana Netflix chu a inpek thu a sawi a, ṭhalaite thiamna hrang hrang hmanga thiamna ril zawk siam chu an tum thu a sawi lang. I&B Secretary Sanjay Jaju pawhin tunlai hun chu creator-te hun a nih thu sawiin, AI-hruaina hmangin thiamna thar zawk hmanga hmasawnna leh hlawkna chu chhuanthar hnenah thlen a ni thei dawn niin a sawi bawk.