India-in Arab foreign ministers’ meet thleng dawn

India chuan January 30-31 hian 2nd India-Arab Foreign Ministers’ Meeting a thleng dawn. Delhi-a meeting neih turah Arab foreign minister 22 an tel dawn a ni.

Meeting neih turah hian kum 2024 kumtawpa sorkar thar dinna, Syria ram foreign minister pawh a tel maithei nia sawi a ni. Syria hi a tel thei a nih chuan Syria president aṭanga Bashar al-Assad paihthlak a nih hnuah India-in ministerial meeting a neihpuina hmasa ber a ni ang. Joint secretary for West Asia and North Africa division, Suresh Kumar chuan nikum July thla khan Syria foreign minister Asaad Hassan al-Shaibani a lo hmu tawh bawk.

Mmewber ram 22 awmna, Arab League hi kum 1945-a din niin, Cairo-ah headquarters an nei a ni. Prime minister Narendra Modi chuan Arab ramte nena inzawmna ṭha zawk a siam chho a, an ramte pawh a lo tlawh kual fo tawh a ni. Nikum December thla khan Jordan leh Oman a tlawh a, League member-te nen pawh thawhdunna zau leh nghet zawk a siam a ni. Kuwait, UAE leh Qatar-te pawh nikum khan a tlawh bawk. India hian UAE leh Oman chu sumdawnna kawnga thawhdunna tur, free trade agreements (FTAs) a ziahpui tawh a, League hnuaia mi Gulf Cooperation Council (GCC) member-te pawh inremna siampui tumin inbiakna a neihpui mek bawk. Kum 2010 aṭang khan India hi Arab League-ah Permanent Representative niin observer angin a awm.

India-Arab Foreign Ministers’ Meeting neih turah hian West Asia dinhmun bakah, he biala India chengte chungchang pawh an sawi ho tur zingah a tel. Energy supply pawh an sawi ho dawn bawk. Arab League-a member hrang hrang ramah hian mi maktaduai kua vel an cheng mek a ni.