Board of Peace for Gaza-a tel turin India sawm

US president Donald Trump chuan Gaza buaina chinfel dan tur ngaihtuahtu tur, 'Board of Peace for Gaza' a tel ve turin India a sawm. Sawmna lehkha hi India-a US ambassador, Sergio Gor chuan social media kaltlangin a tarlang. Board zinga tel ve tur hian prime minister Narendra Modi chu president Trump hian a sawm a ni.

Board of Peace for Gaza-ah hian ram hrang hrang aṭanga tel turin US hian sawmna a tichhuak a, US chuan Gaza Strip-a inrelbawlna mumal zawk siam a nih theihna tur hian hma a la zui reng a ni. President Trump-a'n peace plan a siama Hamas-te ro an relna huam chhunga aṭanga an thuneihna kalsan tura nawrna atana ruahman a ni. India bakah hian Pakistan prime minister Shehbaz Sharif pawh board-a tel tur hian sawm a ni tel ve bawk niin Pathianni khan an tarlang.

Gaza Strip buaina chinfelna tura ruahmana siam a nih theihna atan hian nikum September 29 khan Israel prime minister Benjamin Netanyahu leh Trump-te chu White House-ah an lo inbe tawh a ni Trump-a peace plan siam chu Hamas lamin an pawmpui hnuah inkahhai thawh khatna puan a lo ni tawh bawk.

Board of Peace din a nih tur thu hi president Trump-a'n social media kaltlanga a puan hnuah din nghal niin, social media kaltlang vek hian member turte puan an nih thuai tur pawh a sawi zui bawk. US aṭanga sawmna chu India hian dawng tawh mah se sorkar thuneitu lam chuan 'Board of Peace for Gaza' ah hian an tel ngei dawn em tih chhanna engmah an la tichhuak lo thung.