Republic Day lawmnaah EU hruaitu 2 khuallian dawn

Prime minister Narendra Modi-a'n a sawm tawh angin, January 26-a India Republic Day lawmnaah European Council president Antonio Luis Santos da Costa leh European Commission president Ursula von der Leyen te chu khuallian an ni dawn.

77th Republic Day lawmna hmanpui tur hian EU hruaitu pahnihte hi January 25-ah India an rawn thleng dawn a, January 27 thleng an cham ang.An cham chhungin president Droupadi Murmu an hmu dawn a, PM Modi chu delegation-level inbiakna an neihpui dawn bawk a ni. An inbiaknaah hian India-EU inlaichinna chungchang bakah, hun lo awm zel tur atana political, economic leh khawvel huap kaihhnawih thila thawh hona neih chhoh zel dan turte an sawi bawk ang.

EU hruaitu pahnihte hian January 27-ah 16th India–EU Summit an kaihruai dun nghal dawn bawk tih Ministry of External Affairs chuan a tarlang. Kum 2004 aṭang khan India leh European Union hian inzawmna ṭha tak siamin, kumtin summit hi an nei ṭhin. Mahse, hri leng vangin kum 2020 khan virtual hmanga neih a ni thung.

MEA chuan Republic Day lawmnaa khuallian atana EU hruaitute hman tur leh, India-EU summit neih tur hian India leh European Union inzawmna leh thawh dunna tinghet zual dawn niin a sawi.

Defence Ministry chuan Kartavya Path, New Delhi-a Republic Day lawmna tur atan ngawrh taka inbuatsaih mek a nih thu a sawi. Sorkar laipui chuan a hma a angin Vande Mataram-themed Republic Day hman tum a nih thu a lo sawi tawh a ni.