UAE president Sheikh Zayed India-ah rawn zin

United Arab Emirates (UAE) president Sheikh Mohamed bin Zayed Al Nahyan chu nimin khan India a rawn thleng tih External Affairs Ministry chuan a tarlang. UAE president Sheikh Zayed leh prime minister Narendra Modi-te chu nimin khan inkawm nghalin, India-UAE Comprehensive Strategic Partnership chungchang leh ram pahnih bakah khawvel huap harsatna awm chungchang an sawi dun a ni.

Sheikh Zayed lo zin chhung hian ram hruaitute hian ram pahnih hlawkpui theih tur ve ve kawnga inbiakna an nei dawn bawk. Tun dinhmunah hian UAE hi India sumdawnpui lian ber ni mekin zau zawka thawh dunna siam pawh sawi thawm a awm mek a ni. Sheikh Zayed lo zin hma hian foreign minister S. Jaishankar chuan nikum December khan Abu Dabi hi a lo tlawh tawh a, 16th India-UAE Joint Commission Meeting leh India-UAE Strategic Dialogue vawi ngana a lo neihpui tawh a ni.

Ram pahnihte hian India-UAE Strategic Dialogue neih ṭumah khan heng trade, investment, energy, connectivity, defence, security, development partnership, technology, health, culture, education leh ram mipui inpawh tawnna tura thawh dunna neih chungchangte an lo sawi tawh bawk.