Republic Day : Sawm bik mi 10,000 dawn an tling

Ministry of Defence chuan January 26-a 77th Republic Day Parade, Kartavya Path, New Delhi-a neih turah sawm bik, special guest mi 10,000 dawn an awm tih a sawi.

Republic Day-a special guest atana sawmte hi mi hrang hrang niin, innovator, researcher, start-up, Self Helf Group leh sorkar hmalakna hnuaia hna thawk ṭate an tel a ni. Heng mite hi ram tana an hnathawh hrang hrang avangin, he hun pawimawh takah hian tel tura sawm an ni, tiin ministry thuchhuah chuan a tarlang. Kartavya Path-a lawmna hun hman zawhah National War Memorial, PM Sangrahalay bakah Delhi-a hmun pawimawh dangte an tlawhna turin ruahmanna siamsak an ni bawk.

77th Republic Day lawmna tura inbuatsaihna ngawrh taka kalpui mek a ni a , Delhi police-te pawhin Kartavya Path bakah New Delhi district pumah venhimna uluk zawkin an kalpui a ni. Mi sawm bikte leh ticket holder-te pawh uluk taka an invitation card enfiah a, an kalna tur kawnga hriattirte zawm turin an ngen. Mipuite chu security force-te thawhpui ṭha tura ngenin, thil rinhlelhawm an hriat chu report thuai turin an ngen. Hei bakah kawtthlera bag leh bawm eng emaw dah tawpte chu khawih mai lo turin an ngen bawk a, social media lamah mipui tichiai thei zawnga thu dik tawk lo leh finfiahna awm lo thehdarh lo turin an ti bawk a ni. Khawpui chhung hmun hrang hrangah firfiak, man tuma zawn mekte thlalakte tar chhuah a ni bawk.

Kuminah Republic Day lawmna hmuna ṭhutna hmun tur, seating area hi India rama lui hrang hrang hming vuah an ni.