BJP president 12-na atan Nitin Nabin thlan a ni

Sorkar laipuia rorellai, Bharatya Janata Party(BJP) chuan nimin khan New Delhi-a party headquarters-ah party national president thar atan Nitin Nabin ruat a ni a, BJP president 12-na a ni dawn a ni. Party president thar puanna hun hi prime minister Narendra Modi, BJP president hlui JP Nadda leh union minister - Rajnath Singh, Amith Shah leh Nitin Gadkari-ten an hmanpui.

BJP national president thar tur, Nabin hi kum 45 mi a ni a, Bihar-ah term nga chhung MLA atana thlan tlin a lo ni tawh. Party president atana thlan a nih hma hian nikum December 14 aṭang khan working president dinhmun a lo chelh tawh bawk. BJP national president ni thei naupang ber a ni. BJP hi Nabin pian kum, kum 1980 a din a ni.

Prime minister Narendra Modi chuan party national president thar chu fakin, kum lamah pawh la naupang tak "millenial" a ni a, India inthlak danglamna lian tak hmutu a nih thu a sawi. Party kaihhnawih thil hrang hrangah a 'boss' a ni dawn a ni tiin, BJP enkawlntu ni satliah mai loin NDA thawhpuite zawng zawng nena thawh hona ṭha thlen theitu tur a ni, a ti.