LS attendance member seat aṭang chauhin dah theih dawn : Om Birla

Lok Sabha speaker Om Birla chuan union budget session lo awm turah parliament member-te chu House-a an ṭhutna tur bik siam aṭang chauhin attandance an dah thei tawh dawn tih 86th All India Presiding Officers’ Conference-ah a sawi. LS-a MP-te chu house chhungah an awm loh chuan session kal lo anga chinchhiah zel an ni tawh dawn a, attendance dah dan kalphung thar hi budget session aṭang hian a hnu lam zelah pawh hman chhoh a ni tawh ang.

Attendance dah dan thar hian langtlang zawkin thil a tih theih tir phah dawn a ni. Dan hmasa zawkah khan member-te chu house pawn, parliament huam chhung aṭangin attendance an dah phalsak ṭhin a ni. Ruahmanna thar siamah hian member-te chu house chhungah an awm kher a ngai tawh dawn avangin parliament rorel ṭhutkhawmah pawh member an tel tam phah beisei a ni.

Birla chuan dan thar a puan rual hian Uttar Pradesh Legislative Assembly a fak nghal a, attendance dah dan kalphung thar an hman tur chu UP tihdan an lak chhawn a nih thu a sawi. UP assembly speaker Satish Mahahna chuan assembly-a hmeichhia leh ṭhalai tam zawk an tel theihna turin session hrang hrang a lo ruahman sak ṭhin niin a tarlang bawk.