West Bengal-a Asha worker-ten kawng zawh

West Bengal-ah Accredited Social Health Activists (ASHA) worker-te chuan nimin khan an thla tin lawmman dawn tihsan bakah, life insurance Rs nuai 5 siamsak phutin Kolkata bula state health department headquarters, Swasthya Bhawan panin kawng an zawh.

West Bengal Asha Karmi Union aiawhte chuan an thil phut chungchangah state health secretary Narayan Swaroop Nigam hmuh an duh thu an sawi.

Bengal-a Asha worker-te hi nikum December 23 aṭang khan an nawrh huaihawtin an hnaah an kal tawh lo a ni. An thil phut zingah hian an thla tin lawmman, Rs 5,250 chu Rs 15,000 a tihsan bakah, an duty-naa thite chu life insurance, Rs nuai 5 tihsak an phut bawk. Hei bakah healthcare employee anga pawm an phut bawk a ni. An thil phut tihhlawhtlin sak an nih hma chuan nawrh huaihawt chhunzawm zel an tum thu an lo sawi tawh a ni.

Nimin khan state chhung hmun hrang hrang aṭangin Asha worker-te chuan kawngzawhnaa tel tur hian Kolkata hi an pan a, an zinga ṭhenkhat chuan Sealdah leh Howrah rel station pawn lamah police-ten lo dangin daidanna an siam niin an tarlang. Health department headquarters bulah pungkhawm zingah eng emaw zat chu man an ni bawk.

Asha worker-te hian January 8 khan Swasthya Bhawan panin kawng an lo zawh tawh bawk a, January 12 khan nawrh an huaihawt leh bawk. An thil phut chungchangah senior health official-te chu inbiakna neihpui an duh tih an sawi. Nimina nawrh huaihawt vang hian Swasthya Bhawan chhehvelah venhimna tihkhauh a ni a, motor tlan dante pawh ruahmanna siam a ni tih official-te chuan an tarlang.