Lok Sabha-ah CAB pass a ni

Citizenship (Amendment) Bill chu Thawhṭanni zan, zanlai pelh hnu thleng khan Lok Sabha-ah sawiho a nih hnuin pass a ni ta. Vawiinah he bill hi Rajya Sabha-ah ngaihtuah a ni ve leh ang. 

Union home minister Amit Shah chuan eptu party-ten nasa taka an dodal, CAB hi Lok Sabha-ah a pulut a, sawiho a nih hnuin zanlaiah vote lak a ni. Vote laknaah hian member 391-in an vote a, bill thlawp lamah vote 311 tlain a duh lo lamah vote 80 a tla a, CAB chu pass a ni ta. 

Home minister-in a pharh hnuin CAB hi House-ah hian darkar 12 zet sawiho a ni a, sorkar lam leh eptu lam pawh an inhnial nasa hle. Sawihona neihnaah hian member 48 zetin an ngaihdan an sawi a, an zingah hian he bill dodal nasa ber, hmarchhak bial member-te pawh eng emaw zat an tel. 

Amit Shah chuan bill chungchangah hian thu dik tawk lo thehdarhin hnam ṭhenkhat sawiṭhaihna atante hman a ni a, mahse a nihna dik takah chuan  he bill hi kum 70 zet sakhaw thil vanga lo tuar tawhte hnenah India khua leh tui pekna tur zawk a ni, a ti.  Prime minister Narendra Modi-a kaihhruai sorkar chuan mitinte intluktlanna leh himna a dah pawimawh a, sakhaw thila inthiarhran leh inenhranna a awm ngai lo ang, a ti. 

Prime minister Narandra Modi chuan Lok Sabha-a CAB pass a ni thei chu lawmawm a tih thu sawiin, bill thlawptu party leh MP-te hnenah lawmthu a sawi. He bill chungchang chiang taka a sawifiah avangin home minister Amit Shah chungah a bik takin lawmthu a sawi bawk.  Lok Sabha-a sawiho a nih laiin Home Minister chuan MP hrang hrangten zawhna an neihte chu chiang taka sawifiahin a lo hrilhfiah thei zel a ni, tiin a twitter-ah a tarlang. 

CAB hi Inner Line Permit (ILP) system hman mekna hmarchhak state pathum - Arunachal Pradesh, Nagaland leh Mizoram ah hman a ni ve dawn lo a, hei bakah hian Sixth Schedule hnuaia awm Assam, Meghalaya leh Tripura-a tribal area-ah bik hman a ni lo bawk ang. Manipur-ah pawh ILP system hman a ni dawn tih Home Minister chuan a sawi bawk. 

Lok Sabha-a pass a nih hnuah vawiin hian Rajya Sabha-ah CAB hi ngaihtuah a ni ve leh ang. 

Rajya Sabha-ah hian BJP kaihhruai NDA hian majority a nei pha lo. Bill tlang turin  NDA hian Rajya Sabha-ah hian member 121 thlawpna a neih phak a ngai dawn a, hei vang hian regional party-te thlawpna a mamawh tel hle dawn a ni. 

Thawhṭanni khan  Biju Janata Dal (BJD) leh YSR Congress Party (YSRCP) chuan he bill hi an thlawp tur thu an lo sawi tawh a ni. Hetihlai hian Shiv Sena Party MP, Sanjay Raut chuan an party chuan Lok Sabha-a CAB hi thlawp mah se, Rajya Sabha-a  ngaihtuah a nih hunah chuan a ṭanhmun a thlak mai thei tih a sawi. 

BJP chuan an party Rajya Sabha MP-te hnenah December 10 leh 11-a Rajya Sabha rorel inkhawmah tel vek turin a lo hriattir tawh a ni. Congress party pawhin nimin khan an party Rajya Sabha MP  zawng zawng hnenah hriattirna pein, vawiina Rajya Sabha-a CAB sawiho leh vote laknaah party MP te chu tel vek turin a ti.