EAM Jaishankar leh Spain FM Albare in kawm

External affairs minister S Jaishankar leh Spain foreign minister José Manuel Albare chu Nilaini khan New Delhi-ah inkawmin ram pahnih thawh dunna pawimawhnate an sawi.

Inkawmna neih karlakah hian EAM Jaishankar chuan kumin 2026 a India-Spain thawh dunna kum 70 tlin puala siam, "Dual Year" logo tlangzarhna hun hman nghal a ni. India-Spain "Dual Year" pual logo atan hian open competition siam a ni a, mi 1,900 design theh luh aṭanga thlan a ni.

Jaishankar chuan India leh Spain chuan an inṭhianṭhatna kaltlangin thawh dunna ṭha tak neih theih a nih thu a sawi. Insumdawn tawnna, investment, defence, education leh ram pahnih mipuiten intlawh tawn chungchangte an sawi dun. Tourism chu thawh dunna tura ban pawimawh tak a nih thute a sawi lang bawk.

EAM chuan thla lehah India-in AI Impact Summit huaihawt a tum thu a sawi lang a, AI chu mihring mil tur leh duhdan zawnga kalpui tum a ni, a ti bawk.

India-Spain insumdawn tawnna hian nikum chhung khan USD tld 8 a khum a ni. EAM hian Spain chu India-EU thawh dunna tur atana a thawh hlawk vanga lawm thu a hrilh rualin Europe ram dangte pawh India thlawp Indo-Pacific Oceans Initiative (IPOI) zawm tura an lawm reng thu a tarlang nghal.