US Commission-in CAB vangin Amit Shah hrek duh

Lok Sabha-a Thawhṭanni zana pass tak, Citizenship (Amendment) Bill chu thil dik lo tak a ni tih sawiin, US Commission for International Religious Freedom (USCIRF) chuan sakhaw inthliarna hawi zawnga bill siam hi Parliament in hniha pass a nih chuan home minister Amit Shah leh hruaitu dang pawimawhte hrekna siamsak ngei turin America sorkar hnenah a ngen. 

Thuchhuah an siamah, USCIRF chuan CAB hian India rama pemlut, Muslim te huam tel loin India khua leh tui nihna pek theihna tur kawng a siamsak a ni tiin, sakhaw behchhana khua leh tui pekna dan a ni, a ti. Lok Sabha-a CAB pass a ni chu pawi a tih chu sawiin, USCIRF chuan Parliament in hnihah pass a nih chuan US sorkarin Amit Shah bakah India ram hruaitu pawimawh dang chu hrek dan a ngaihtuah a ngai a ni, tiin a sawi. 

Assam-a National Register of Citizens (NRC) kalpui mek leh, Amit Shah-a'n NRC hi India ram puma kalpui tum a nih thu a sawi chungchang pawh USCIRF chuan sawichhuakin, India sorkar chuan hemi  hmang hian India rama Muslim mi nuai telte khua leh tui nihna chu a hlihsak mai an  hlauhthawn thu a tarlang. 

Congressional Committee pawhin CAB chu a ngaihmawh thu a sawi bawk a, khua leh tui nihna pekna tura sakhaw behchhana hman chuan India leh US-in a ngaihhlut tak, sakhaw intluktlanna a paihthla a ni, a ti. House Foreign Affairs Commi­ttee chuan nimin khan twitter-ah, sakhaw intluktlanna chu India leh United States innghahchhan, ram pahnihten an dah pawimawh leh ngaihhlut taka nih thu sawiin, sakhaw behchhanna khua leh tui nihna inpek chu democracy innghah­na bawhchhiatna a nih thu a tarlang.