2025-ah India-a air traffic tam ber record siam

India chuan nikum November 23 khan ram chhunga ni khata thlawhtheihna hmanga zin veivak, air traffic tam ber ni record a siam. Civil Aviation Ministry in a tarlan danin, hemi ni hian ram chhungah thlawhtheihna 3,356 thlawk kualin, khualzin 5,38,249 an awm a ni.

Ram chhungah aviation service lamin hma a sawn zel a, kum thum kalta chhung khan ni khatah thlawhtheihna hmanga zin hi nuai nga an tlin ṭum a awm fo a ni. Nikum November 23-ah hian flight schedule pawm sa aṭangin 88.66% an thlawk chhuak tih Ministry chuan a tarlang. Kum 2016, October 21-a prime minister Narendra Modi-a'n UDAN- `Ude Desh ka Aam Nagrik’ Scheme, a tlangzarh hnu khan thlawhtheihnaa khualzin hi an pung chho zel tawh tih a sawi.

Ram chhunga aviation infrastructure thuam chakna turin Navi Mumbai, Patna, Datia leh Satna (Madhya Pradesh), Amravati, Tuticorin, Purnea (Bihar) leh Guwahati-ahte airport thar leh terminal facility te hawn an lo ni tawh bawk a ni. Hengte hian inkalpawhna lam a tihchangtlun phahin, a bikin Bihar, Madhya Pradesh, Maharashtra leh Tamil Nadu ahte economy lam a ṭhat phah hle tih a sawi. Guwahati-a Lokapriya Gopinath Bardoloi International Airport-a Integrated Terminal Building thar chu India rama nature-themed airport terminal hmasa ber a ni.

Directorate General of Civil Aviation (DGCA) chuan kum 2025 khan Commercial Pilot Licenses (CPL) 1,628 a pek chhuak a, kum khata a pek chhuah tam ber a ni. Kum 2018-ah cPL hi 640, 2019-ah 744, 2020-ah 578, 2021-ah 862, 2022-ah 1,165, 2023-ah 1,622 leh 2024-ah 1,347 a pe chhuak tawh bawk.