Indian Railway-in khualzin pui thei tur Robot hmasa ber hmang ṭan

Indian Railway chuan tunlai thiamna ṭhang zel mila changkanna panna atan, East Coast Railway, Visakhapatnam Railway Station hnuaiah India rama a hmasa ber turin humanoid robot, "ASC Arjun" tih chu an hmang ṭan. Robot hi khualzinte himna, security, leh mipui mamawh phuhruk thei tura duan a ni a, tunlai thiamna mila hmasawnna pawimawh tak tilangtu a ni thei dawn a ni.

Humanoid robot thar hi Hindu history lar tak leh khawvela poem sei ber ni bawk, Mahabharata ami Arjuna hming chawia phuah a ni a, robot hi Railway Protection Force(RPF) venhimna hnuaia dah a ni bawk. Ministry of Railway chuan Ningani khan Inspector General (RPF) Alok Bohra leh Divisional Railway Manager (DRM) Lalit Bohra telpuiin Visakhapatnam Railway Station-ah robot thar hi khuh hawn a nih thu an tarlang.

Railway chuan robot thar hi RPF tihhmasawnna leh digital lam hawia insiam ṭhatna a nih thu an sawi a, railway inrelbawlna hrang hrang pui thei tur leh venhimna kawng hrang hranga pui thei tura ngaih a ni. Hemi bakah hian khualzinte pui thei tur, mipui pungkhawm lo sawngbawl tur bakah, faina kenkawh leh himna lam inzirtirna pe thei tura duan a nih thu an sawi bawk.