State la hmabakah SIR kalpui a ni leh thuai dawn: CEC

Chief Election Commissioner Gyanesh Kumar chuan Inrinni liam ta khan tuna state leh UT ṭhenkhata voter list ennawnna, Special intensive Revision (SIR) kalpui chu state dang la kalpui ve lohnaah kalpui ve leh a nih thuai tur thu a sawi.SIR kalpui chu democracy innghahna lungpui pawimawh tak a nih thu a sawi lang.

Kumar hian Election Commission din ni pual leh 'National Voters' Day' anga lawm ni bawk puala thu a sawiah, SIR neih mek chu state leh UT 12-ah tluang taka kalpui a nih thu a sawi. SIR chu ram mipui vote nei thei ngei ten vote an neih theihna tur leh, a nei thei lote paih an nih theihna tura hmalakna a nih thu sawiin, Bihar-ah zawh fel tawh niin Assam chu kalpui lehna tur hmabak a nih thu a tarlang.

Bihar-a SIR kalpuina zawhfel a nih hnuah khan inthlan kalpui chhunzawm niin CEC chuan kum 1951 hnua vote thlak an tam ber ṭum a nih thu leh, vote 71.78% a tla tih a sawi. Hengte vang hian inthlanna dik leh hlawhtling nei tur chuan SIR kalpui chu thil ṭha tak a ni tiin, elector zingah a bikin ṭhalaite chu vote thlak uar leh zual turin a chah zui bawk.

Election Commission hi kum 1950 January 25 khan din niin hei hi India mipui thlan sorkar a din hma ni chiah kha a ni. Kum 16 liam ta aṭang khan January 25 hi 'National Voters' Day' a hman a ni zui ta bawk a ni.