COAS Dwivedi leh US Army secretary Driscoll inkawm

India sipai hotu lu, Chief of Army Staff(COAS) General Upendra Dwivedi leh US Army secretary Daniel P. Driscoll-te chu Pathianni khan New Delhi-ah an inkawm.

Dwivedi leh Driscoll-te hian ram pahnih sipai huang thawh dunna thuk zawk leh nghet zawk siam chungchang an sawi dun a, information inpek tawn chungchang te, chhawmdawl hna leh chhan chhuah hna thawhna inpuihtawn dante an sawi tel. Ram pahnih force ve ve kaltlanga khawvel puma remna leh muanna thlen thei zawnga hma lakte chu an thil tum zingah a tel bawk.

India leh US hian defence huanga kawng pawimawh hrang hrangah thawh dunna ṭha tak an nei a, nikum November khan Chief of Naval Staff Admiral Dinesh K Tripathi chu ram pahnih thawh dunna tih chakna turin US-ah a lo zin ve tawh bawk a ni.