RJD-in inthlanah ballot paper hman phut

Bihar-a eptu pawl, Rashtriya Janata Dal (RJD) chuan ram chhunga inthlan neih zel turah vote thlakna atana ballot paper hman an phut a, an thil phut nawrna atan ram pum huap campaign neih an tum.

Tun hnaiah Patna-a national executive committee meeting an neihah, RJD chuan mipuiten duhthlanna siamna turah pawisa leh sorkar thuneihnate chu dik lo takin mipui rilru hruaikawina atan hman a ni, tiin resolution an pass bawk. Meeting-ah hian Tejashwi Prasad Yadav chu party national working president atan ruat a ni.

Yadav chuan an party-in Election Commission-ah inthlanah ballot paper hmang zel tawh tura rawtna a thlen chungchangah, ram chhunga eptu party hrang hrang hruaitute pawh a hmu dawn tih a sawi. Ballot paper hman zel a nih theihna atan theihtawpa nawr an tum tih a sawi bawk.

RDJ hi Bihar, Jharkhand, Manipur leh Nagaland-ah recognised party a ni a;mahse, Jharkhand assembly inthlanah a chet chhiat avangin national party a nihna a hloh a ni. He inthlana an chet chhiat chhanah hian EVM an puh. Inthlanah hian seat 243 an chuh aṭangin seat 25 chauh an la a ni.

Party president hlui, Jagdanand Singh chuan EVM chu a dik tawk lo tih sawiin, vote thlak hma aṭangin EVM tinah chuan vote 25,000 vel a awm sa vek niin a tarlang. Hetichung hian seat 25 chu an la thei niin a sawi. Hei vang hian RJD chuan EVM chu khawih chingpen theih, inthlanna atana him lo niin an ngai a, ballot paper hmanga vote thlak leh an duh tih an sawi. Hetihlai hian Bihar chief electoral officer chuan EVM-a vote 25,000 awmsa ni anga sawi chu thil theih loh a nih thu a sawi thung.