Parliament-ah bill 23 tikhawtlai

Parliament thlasik ṭhutkhawm neih mekah, pawisa note tih thih chungchangah eptu leh rorellai member-te in auhbuai vanga hun rei tak rorel mumal loa an awm tawh avangin bill ngaihtuah tura tih 23 chu tihkhawtlai mek an ni.

Rorel lai, NDA hruaitute chuan tun
ṭum session hian bill pawimawh tak tak 23 put luh, ngaihtuah leh pass tur a awm niin an sawi. Heng zingah hian Central Goods and Services Tax Bill bakah hemi nena inkaihhnawih Integrated Goods and Services Tax Bill leh Goods & Services Tax (Compensation for Loss of Revenue) Bill te an tel.

Bill tihkhawtlai zingah hian Lok Sabha-a ngaihtuah tur Mental Health Care Bill, Maternity Benefit (Amendment) Bill leh Consumer Protection Bill bakah, Rajya Sabha-a ngaihtuah tur Whistle Blowers Protection (Amendment) Bill, Prevention of Corruption (Amendment) Bill, Enemy Property (Amendment and Validation Bill HIV & AIDS (Prevention & Control) Bill 2014 leh Employees Compensation (Amendment) Bill 2016 pawh an tel a ni.

Parliament session ṭan a nih aṭangin eptu lamte chuan sorkar laipuiin pawisa a tih thih avanga mipuite chunga harsatna leh buaina a thlen dante sawiho an phut a, Prime Minister Narandra Modi chu hemi chungchangah hian thu sawi turin an phut bawk. Mahse tun thlengin PM Modi hian pawisa tih thih chungchangah hian House-ah thu a la sawi lo.

Eptuten an thil phut nawra rorel inkhawm an auh buai reng avangin session ṭan aṭanga a ni 13-na, nimin thleng khan rorel thei loin inkhawm hi tihtawp a la ngai fo a ni.

Parliamentary Affairs Minister Ananth Kumar chuan nimin khan Congress leh eptu party dangte chu House-a rorelna kalpui tawh turin a ngen a, sorkar chu an zawhna neihte chhang turin a inpeih tih a sawi. Ananth Kumar chuan a ṭul a nih chuan zawhna chhang turin Prime Minister pawh a inpeih a ni tiin, House pahnihah hian Finance Minister chuan zawhnate a chhang dawn a ni, a ti.