Ramchhung Lawrkhawm
Court-a hnam hla play tura ngenna ngaihtuah duh lo
Supreme Court-in ramchhunga cinema hall hrang hrangah film tihchhuah hmaa hnam hla play tura hriattirna a tihchhuah hnuah, court hrang hrangah pawh play tura ngenna thehluh a ni a, mahse hei hi Supreme Court chuan a ngaihtuah duh lo.
Court rorel ṭan hmaa hnam hla play zel tura ngenna hi lawyer Ashwini Upadhaya chuan a theh≠lut a ni. Supreme Court chuan Attorney General hnenah hemi chungchanga sorkar ngaihdan a zawt a, mahse court-a petition a thehluh dan chu dan ang taka tih a nih loh avangin a ngaihtuah duh lo. Petition thehluttu hnenah hian court-ah ngaihtuah a duh takzet chuan petition hi dan dik taka thehlut turin a ti a ni.
West Bengal CM-in an state-a sipai dah luh sawisel
West Bengal Chief Minister Mamata Banerjee-i chuan Ningani zan khan an state-a toll plaza pahnih, Palsit leh Dankuni-ah state sorkar hriattir lohin sorkar laipui chuan sipai a dah nia sawiin na takin a sawisel.
West Bengal-a rorellai, Trinamool Congress chuan he thil hi sorkar inrelbawl dan palzutna dik tak a ni tiin, state-in dikna chanvo a neihte palzut sak a ni, a ti.
He thil thleng chungchang hi nimina Rajya Sabha inkhawmah sawichhuah a ni a, eptu party dangte chuan Mamata Banerjee hi thlawpin, sorkar laipui chet dan chu an dem thu an sawi. Bengal CM chunga sorkar thiltih dan chu ram danpui kalh a ni tih sawiin, sipaite chu politics khelhna hmanruaa hmang lo turin BJP kaihhruai sorkar chu an duh thu an sawi.
Parliament session-ah MP Mann tel remti lo
Lok Sabha Speaker Sumitra Mahajan-i chuan Aam Aadmi Party (AAP) MP Bhagwant Mann chu December 9 thleng House rorel inkhawmah a la tel thei lo tih a sawi.
AAP MP hian July 21 khan Parliament session-a a kal tur chu a Facebook-ah live-in a pe a, House chhunga security kalpui a nih dan te, duty te awmna hmunte a tilang tel a ni. He thil hi Parliament himna tiderthawng thei nia ngaih a nih avangin sawisel pawh a tawk nasa hle a, July 25 khan panel chuan a thil tih hi chhui chiangin, an chhui chhung chu Parliament inkhawma a tel phalsak a ni lo.