Thlawhtheihna chesualah Maha Dy CM a thi

Maharashtra deputy chief minister, Ajit Pawar chu tukin zing khan thlawhtheihna chesualah a thi. Thlawhtheihnaa chuang, pilot leh mi dang pali pawh an thi vek a ni.

Kum 66 mi, Pawar hi Mumbai aṭangin a constituency, Pune district-a Baramati-a vantlang inkhawm hmang turin charter flight, Bombardier Learjet 45 in a kal a, Baramati airport-ah a ṭum dawnin thlawhtheihna hi a chesual a, a kang zui bawk a ni. A chetsual chhan hi hriat a la ni lo a, Aircraft Accident Investigation Bureau in a chhui zui nghal a ni. Mumbai aṭangin Baramati hi km 256 vela hla a ni a,minute 45 vel an thlawk ṭhin. Zing dar 8: 10-ah Mumbai an chhuahsan a, zing dar 8:43 ah thlawhtheihna hi an bepawp thei tawh lo a, dar 8:46-ah a chetsual niin an sawi.

Flight hi VSR Ventures Pvt Ltd enkawl a ni. Learjet 45-ah hian passenger pakua an chuang thei. A chesual lai leh a kang lai hi highway camera-in a lo la fuh a ni.

Pawar hi a zawn loa Maharashtra deputy chief minister dinhmun chelh rei ber niin, ṭum ruk he post hi a chelh tawh. Congress sorkar laiin Prithviraj Chavan leh BJP sorkarah Devendra Fadnavis te a lo thawhpui tawh a, Shiv Sena hruaitu pahnih Uddhav Thackeray leh Eknath Shinde hnuaiah deputy CM a lo ni tawh bawk.

Chief minister Devendra Fadnavis chuan chetsualna thleng chuan a ṭhawng hle tih sawiin, a ṭhianṭha leh thawhpui chak tam mai a chan tih a sawi. Maharashtra sorkar chuan Pawar hi state pumah ni thum chhung a ni dawn tih sawiin, hemi chhung hian hnam puanzar a ngul chanveah zar a ni ang a, sorkar office leh school leh khar a ni ang.

Prime minister Narendra Modi pawhin X-ah Pawar a ui thu sawiin, mi thawkrim leh mite zah tak a ni a ti a, mi harsa leh rethei zawkte chawikanna tura a inpekna chu hriatrengtlak a nih thu a tarlang.