Black money Rs vbch 13,000 neitu thu zawtfiah

Gujarat Police-te chuan sum chheprelh, black money cheng vaibelchhe 13,000 a neih thu puangtu, Ahmedabad-a sumdawng Mahesh Shah chu thu an zawtfiah.

Mahesh Shah hian thla hmasa khan black money, cheng vaibelchhe 13,000 a neih thu hi a puang a, hemi hnu hian hun eng emaw chen chu chin hriat lohin a bibo zui a ni.

Nimin khan Shah hi ETV Gujarati channel-ah an kawm a, a sum chheprelh te chu ama pawisa loin, politician leh sumdawng lianten an dah
ṭhat tir niin a sawi a, mahse an hming erawh a sawilang duh lo thung. TV-a a lan hnu hian Income Tax leh police official-te chuan thu zawhfiah turin an la nghal a ni.

Income Declaration Scheme hnuaia sum tam tak a chheprelh thu a puan hnu hian Shah hi Income Tax thuneitute chuan an zawng nghal a ni. A chenna in leh office-te pawh dap a ni a, a accountant Tehmul Sethna office pawh dap a ni bawk.

Sethna chuan Shah chu Class 12 thleng lehkha a zir thu leh, mifing tak a nih thu a sawi a,hmelhriat pawh a nei ṭha thei hle niin an sawi. A sum neih dan chungchang a puanzar hian Income Tax Department chuan Shah hi venhimna pek an tiam a, mahse kar khat chhung chu a chin hriat lohin a bo zui a ni. A sum lakluh dan tak hi hriat chian a ni lo a, Gujarat, Maharshtra leh South India lamah real estate investment a ti nia sawi a ni.