India leh Russia-in inremna ziak dawn

Tamil Nadu-a Kudankulam power plant unit 5 leh 6 siam turin India leh Russia chuan tun thla chhungin inremna, General Framework Agreement (GFA) an ziak dawn.

Department of Atomic Energy (DAE) official chuan ram pahnih hruaitu, Prime Minister Narendra Modi leh Russia President Vladimir Putin chuan inremna thuthlung hi December thla chhunga ziahfel turin an lo rel tawh a, hemi atan hian inbiakna pawh neih mek a ni, a ti.

Kudankulam project siamna tur inremna hi kum 1988 khan prime minister hlui Rajiv Gandhi leh Soviet union president hlui Mikhail Gorbachev-teín an ziak a, mahse kum 1997 aṭangin hna thawh ṭan chauh a ni. Plant-a unit 1 leh 2 te chu cheng vaibelchhe 20,962 sengin siam a ni a, he unit aṭang hian Tamil Nadu, Karnataka, Kerala leh Puducherry tan power pekchhuah a ni. Unit 3 leh 4 chu kum 2022-23 ah zawhfel hman beisei a ni bawk. Unit 1-6 te hi zawhfel a nih hun chuan power MW 6,000 a pe chhuak thei ang.