Amritsar-ah Heart of Asia conference nei

Heart of Asia-Istanbul Process conference vawi 6-na chu nimin khan Amritsar-ah nei a ni a, he conference-ah hian ram 14 aiawhte an tel a, Pakistan Foreign Affairs Adviser Sartaj Aziz pawh a tel a ni.

Conference hawngtu, Prime Minister Narendra Modi chuan firfiakte beih let a ṭul zia sawiin, firfiakte pawikhawihna thleng ṭhin chu ngawih bopui a, action lak a nih loh chuan misualte a ti pawngpawrh zawk a ni, a ti.

Afghanistan leh a chhehvel biala firfiakte pawikhawihna thleng fo tihtawp a, remna leh muanna a awm duh thu sawi ringawt chu a tawk lo a, a taka chet chhuah tel a ngai a ni tiin Modi chuan a sawi. Firfiakte laka chauh ni lo, firfiaka chetna thlawp a, awmna tur pe a, sum hmanga lo pui ṭhinte chungah pawh action lak a ngai tih a sawi.

Heart of Asia summit kum 2011 khan Istanbul-ah ṭan a ni a, hei hi Afghanistan leh a ṭhenawmte ramte economic leh security lama an thawhdunna ṭha siam a, firfiakte chetna leh retheihna avanga harsatna thleng
ṭhin chinfel dan kawng sawihona atan buatsaih ṭhin a ni

Afghanistan President Ashraf Ghani pawhin thu sawiin, a ṭhenawm ram Pakistan-in firfiakte a thlawp a nih chuan pawisa eng anga tam hmang pawhin an ram buaina chu chinfel theih a ni dawn lo tih a sawi. Pakistan sipaiten firfiakte laka beihpui an thlak chuan nghawng lian tak a nei tih a sawi a, Taliban firfiak pawl ngei pawhin Pakistan puihna lo chuan thla khat pawh an awm lo tih an sawi tawh a ni, a ti. Afghanistan ram hmasawnna tura India-in phut let nei loa a pui
ṭhin chu lawmthu a sawi bawk.