Ramchhung Lawrkhawm

Indo-Pak ramri-ah laser wall siam dawn

Sorkar laipui chuan Pakistan ram aṭanga ramri paltlanga rawn lut ru ṭhinte venna atan, India leh Pakistan ramri-ah laser wall siam a tum a, hei bakah hian advance system dang pawh dah a tum.

He thu hi Union Minister of State for Home Kiren Rijiju chuan a sawi a, laser wall siam hna hi kum khatah zawh hman tum a ni, a ti. Laser wall hi Jammu and Kashmir, Punjab, Rajasthan leh Gujarat-a ramri ven hna thawktu, Border Security Force (BSF)-teín an enkawl dawn a ni. Punjab-a international border-ah chuan laser wall sawm chuang zet siam a ni tawh. Laser wall siam hi kum hnih kalta khan BSF chuan a lo rel tawh a ni.

Pawisa note dahluh zingah a lem 3.4% a awm

Sorkar laipuiin black money, pawisa lem leh helhote puihna nana sum hman ṭhinte tihbona atana Rs 500 leh Rs 1,000 note a tih thih hnu a, bank-a pawisa note dah luh zingah pawisa lem 3.4% a tel.

November 27 thlenga bank-a pawisa note hlui dahluh zingah, a lem cheng vaibelchhe 9.63 a tel a ni. Hetihlai hian Rs 500 leh Rs 1,000 note lem leng vel hi kumin kum chanve hma lam khan cheng vaibelchhe 400 vel zet a tling niin Indian Statistical Institute (ISI) chuan a sawi a ni.

Online Reader’s Poll-ah Modi-a sang ber

ëTIME Person of the Year 2016í online reader poll-ah Prime Minister Narendra Modi chuan vote a hmu sang ber.

Online hmanga vote thlak theih hun chu Pathianni zan khan khar a ni. PM Modi hian vote tla aṭangin 18% hmuin a hmu sang ber a, hruaitu langsar dang US President-elect Donald Trump, US President ṭanglai Barack Obama leh Russia President Vladimir Putin-te a khum a ni. TIME magazine editor-te chuan tunkar hian Person of the Year hi an thlang dawn a, Modi-a hi lawmman dawng thei hming chhawpchhuah zinga a zawna kum li a telna a ni. Nikum khan TIME Person of the Year atan Germany Chancellor Angela Merkel-i thlan a ni.