ICU-ah Jaya-i dah lut leh, a dinhmun a ṭha lo

6th December, 2016

Tamil Nadu Chief Minister J Jayalalithaa-i chu Chennai-a Apollo hospital-ah hun rei tak enkawl a ni tawh a, ṭhat lam a pan zel nia an sawi laiin Pathianni zan khan cardiac arrest (lung ṭha lo) a neih leh avangin Intensive Care Unit (ICU)-ah dah luh leh a ni a, a dinhmun a ṭha lo hle.

Kum 68 mi, Jaya-i hi September 22 khan khawsik sang leh dehydration vangin Apollo hospital-ah dah luh a ni. A dinhmun hian ṭhat lam a pan a, ICU aṭangin ward-ah dahchhuah a ni tawh a, in lam panin a haw thei thuai tawh dawn nia sawi a nih hnu lawkah, cardiac arrest hi a nei leh ta a ni. ICU ah dah luh a nih hnu hian ECMO or Extra-Corporeal Membrane Oxygenation khawl leh life support system dang hmanga enkawl a ni a, specialist-teín ngun takin an vil reng a ni.

Hospital chuan CM dinhmun hi a la puang chhuak lo a, mahse thawktu lam chuan a dinhmun hi a la ṭha lo hle niin an sawi. Jaya-i hi cardiologist, pulmonologist leh critical care specialist team-teín an enkawl tih, Dr Subbaiah Viswanathan chuan a sawi.

ICU-ah Jaya-i dah luh a nih leh avang hian Tamil Nadu Governor C Vidyasagar Rao chuan Pathianni zan vek khan Maharashtra aṭangin Chennai a pan a, Jaya awmna damdawi-inah minute 10 vel a awm a, hemi hnu hian Union Home Minister Rajnath Singh biain, Jaya-i din≠hmunte a hrilh a ni.

Tamil Nadu minister rualte pawh hospital-ah hian an kalkhawm nghal a, state pawn lama rorellai, AIADMK minister leh MLA zin chhuakte pawh an haw khawm nghal a ni.

Jaya-i thlawptu mi tam tak chu hospital bul≠ah pungkhawmin a tan an
ṭawngṭai a, mipui pungkhawm an tam avangin hospital leh a chhehvelah venhimna pawh tihkhauh nghal a ni a, hospital panna kawngpuite pawh an a ni. A ṭul thulha tirh theih turin anti-riot police 900 pawh inrin tir an nih thu Press Trust of India chuan a tarlang.

Congress vice president Rahul Gadhi, union minister Venkaiah Naidu leh political leader dangte chuan hospital hi tlawhin Jaya chu dam ṭha leh thuai tura an duhsak thu an sawi. Mahse hospital-a kalte pawh hian Jaya-i hi an hmu thei chuang lo a ni.