February 27-ah Israel-ah PM Modi a zin dawn

Prime minister Narendra Modi chu February 27-ah Israel ramah a zin dawn a, PM term thumna a chelh chhunga Israel a tlawhna hmasa ber tur a ni. A tlawh hnuhnun ber chu kum kua dawn liam taah khan a ni.

Israel sorkar hian PM Modi hi an ram tlawh turin a hmain a lo sawm tawh a ni. PM zin tur hi kawng hrang hrang - defence, technology, agriculture, cybersecurity leh counter-terrorism lama ram pahnihte thawh dunna tihchakna tur atana tih a ni.

Tun thla tir lam khan Modi leh Israel prime minister Benjamin Netanyahu te chu telephone-in an lo inbe tawh bawk a, hehi thla hnih chhunga an inbiak ṭum hnihna a ni. Netanyahu hian Gaza Peace plan kalpui a nih dan leh hma an sawn zel dante a hrilh a, Modi pawhin boruak muanawm a awm a duh thute pawh a lo hrilh ve bawk. India hi kum 2023, October 7-a Palestinian firfiak pawl, Hamas in Israel an beih ṭum khan Hamas chetdan leh pawikhawihna thleng demna thu sawi hmasatu ram zingah a tel.

Nikum khan external affairs minister S Jaishankar leh trade minister Piyush Goyal-te chuanI Israel an tlawh a, Israel economyh minister Nir Barkat, finance minister Bezalel Smotrich leh foreign miniister Gideon Sa'ar te pawh India-ah an rawn zin tawh bawk. Ram pahnih hruaitute hian insumdawn tawnna chungchanga inremna, free trade agreement siam dan turte an sawi a ni. FTA atana inbiakna neih dan turah Term of Reference pawh an lo ziak tawh bawk. Trade talk neih dan tur chungchangah February thla hian Israel aiawhten India an rawn tlawh beisei a ni.

Modi-a'n kum 2017, July thlaa Israel a tlawh khan India prime minister zinga Israel tlawh hmsa ber a ni. Hei hi India leh Israel inpalai tawnna kum 25-na kum a ni. Hemi ṭum hian Modi hian Ramallah a tlawh lo a, Palestinian hruaitute pawh a hmu lo bawk a ni.