Rajya Sabha-ah CAB an pass

Union home minister Amit Shah chuan nimin khan Rajya Sabha-ah Citizenship (Amendment) Bill pharhin sawiho a nih hnuah pass a ni ta. He bill hi Thawhṭanni zan khan Lok Sabha-ah pass a lo ni tawh bawk.

Rajya Sabha-ah member 240 an awm mek a, BJP  kaihhruai NDA sorkar chuan bill pass tur hian MP 121 thlawpna a hmuh a ngai. BJP chuan Rajya Sabha-ah hian MP 83 a nei mek a, bill tlang tur hian MP dang 38 te thlawpna a neih tel a ngai a ni. Mahse nizana vote laknaah MP 10 an tello. Vote thlak lo zingah hian Shiv Sena MP-te pawh an tel a ni. Vote lak a nih hnuin bill thlawp lamah vote 125 tlain a duh lo lamah vote 105 a tla a, CAB chu pass a ni ta a ni. Bill thlawp lamah hian BJP bakah JD(U) leh SAD,  AIADMK, TDP leh YSR-Congress an tel. 

CAB duh leh duh lo vote lak hma hian siamṭhat tura Select Committee of Parliament hnena thawn rawtna chungchangah vote lak a ni bawk a, hei pawh hi hnawlsak niin Select Committee hnena thawn duh lo lamah vote 124 tlain a duh lamah vote 99 a tla thung. Hei vang hian he bill hi select panel in a ennawn tawh dawn lo. 

CAB hi Union Home Minister-in a pharh hnuah sawiho zui nghal a ni a, Rajya Sabha Speaker Venkaiah Naidu chuan sawihona atan hian darkar ruk hun a pek chu a pawhsei sak a, bill sawiho chhung hian chawlh lailawk neih a ni lo bawk. 

Bill pharhtu Amit Shah chuan ram ṭhenawm Pakistan leh Bangladesh-ah chuan sakhaw tlem zawkte chu 20% zetin an kiam tawh tih sawiin, hei hi sakhaw thil vanga tihduhdah leh tihhlum hialte an tawh bakah India ramah himna zawnga an tlanchhiat nasat vang a ni, a ti. CAB chu heng mite, India rama rawn tlanchhiate hnenah khua leh tui nihna pekna tur a nih thu a sawi. 

Amit Shah chuan CAB vang hian India rama Muslim-te tan hlauh tur a awm lo a, India khua leh tui an la ni reng dawn tho a ni, a ti. Hemi rual hian eng ram aṭang pawha Muslim rawn lutte chu khua leh tui nihna pek an ni dawn lo tih a sawi nghal bawk. Union Home Minister-in thu a sawi zawh hian bill hi sawiho zui a ni. 

Eptu member-te chuan Amit Shah thusawi lai hi an lo au khum a, hei vang hian House chairman vice president Venkaiah Naidu thupek angin TV-a Rajya Sabha rorel inkhawm pekchhuah chu hun rei vak lo tihtawp a ni. Hemi hnu hian Naidu chuan eptu member-te chu thu sawi lai tibuai tawh lo tur leh, a lo aubuai chu an hming lamchhuakin House aṭanga chhuahtir an nih tur thu a sawi a ni. 

Darkar ruk chhung sawiho a nih hnuah debate kharnan Amit Shah chuan eptu memberte zawhna hrang hrangte a chhang a, kum 50 kal taah khan he bill hi put luh tawh tur  a nih thu sawiin, Article 14 bawhchhiatna a ni lo tih a sawi. "Ram chhunga minority community-ah, Muslim telin, nghawng a nei dawn lo. An khua leh tui nihna lampang a ni lo. Hei hi pem lut chungchang a ni" a ti. Sri Lanka Tamil-te thliar hranna a awm lo tih sawiin, Shiv Sena a bei zui a, zan khat thil thua an rilru an thlak chhan chu Maharashtra mipuite hnenah an hrilhfiah a ngai dawn a ni, a ti. 

Assam mipuite tan manganna tur a awm loh thu sawiin, House-a eptu party-te thusawi dan chu Pakistan nen a khaikhin a, a inang hle tih a sawi. CAB, NRC leh triple talaq bill-te hi Muslim dodalna a ni lo a, bill-ah hian Muslim kalh zawng engmah a awm lo tih a sawi a ni.