Tripura leh Assam-ah Sipai dahluh a ni

Nimina Rajya Sabha-a Citizenship (Amendment) Bill chungchanga debate neih a nih mek lai khan Tripura leh Assam-ah chuan sipai dahluh a nih thu tarlan a ni.

Tripura-a Kachanpur leh Manu area-ahte chuan sipai column hnih dah luh a ni a, Assam-a Bongaingon-ah pawh column khat dah luh a ni bawk. Column khatah hian sipai 70 leh hruaitu pakhat zel an awm a ni. Thawhlehnia hmarchhak puma bandh huaihawt a nih khan Tripura-ah chuan sumdawng mite beih an ni a, dawrte pawh hal a ni bawk. Guwahati kawngdungah pawh motor ke hal an tam hle, buaina chhuahna hmunah chuan mipui hnawhdarhnan tear gas-te pawh hman a ni hial.

Tripura-ah chuan Thawhlehni chawhnu dar 2 aṭang khan internet service tihtawp ni bawkin, buaina chhuakah hliam mi pali vel an awm bawk. Tripura buaina chhuakah hian sumdawng mi pathumin beih an tawk a, Dhalai district-a thlai zuar pakhat chuan beih tawk bawkin a dinhmun a ṭha lo hle. Dhalai district-ah tho hian dawr hawn avangin dawr halsak tawkte pawh an awm a, bike pariat vel hal a ni bawk.